ლოცვანი ყოვლადწმიდა ღვთისმშობლის ხატის „ღვთისმოყვარეს“ მიმართ

ტროპარი, ხმა 1

ღმრთისმოყუარეო დედაო, ქორწილსა გამოუცდელო ქალწულო, ღმრთისმშობელო მარიამ, ევედრე ჩუენთჳს შენგან შეყუარებულსა და შენგან შობილსა ძესა შენსა ქრისტჱსა ღმერთსა ჩუენსა, მოგვეც ჩუენ ძალა ცოდვათა ჩუენთა დატევებისათჳს, მოჰმადლე ქუეყანასა ამას ნაყოფიერებაჲ და მშვიდობაჲ, მღუდელთა სიწმიდე და ყოველსა ერსა ცხოვრებაჲ მოანიჭე, დაიცევ მამული ჩუენი გარე-მოდგომილებისაგან მტერისა და ძმათა მკვლელთა ომთაგან, ჰოჲ, ღმრთისმოყუარეო დედაო, ჰოჲ, ყოვლადსაგალობელო დედუფალო, დამიფარენ ჩუენ ყოვლისაგან ბოროტისა საფარველითა შენითა, ხილულთა და უხილავთა მტერთაგან დამიცვენ და იჴსნენ სულნი ჩუენნი.

ლოცვა

ჰოჲ, ყოვლადწმიდაო დედუფალო ღვთისმშობელო, ღვთისამოყუარეო დედაო, სასოო ჩუენისა ცხოვნებისაო! მოწყალებითა მოჰხედენ ყოველთა, რომელნი სარწმუნოებითა და სიყუარულითა შეუვრდებიან ხატსა შენსა. მიიხუენ სადიდებელნი გალობანი ჩუენნი და შესწირე მხურვალე ლოცვანი შენნი ჩუენ ცოდვილთათჳს წინაშე ღვთისა, რაჲთა უგულებელს-ყვნეს ცოდვანი ჩუენნი, მაცხოვნნეს და შემიწყალენ ჩუენ, ჰოჲ, ყოვლადსაკვირველო დედუფალო, მიჩუენენ მოწყალებანი შენნი, მიჴსენ ჩუენ ყოვლისაგან მწუხარებისა, ყოველნი სათნოებითნი და ქველისმოქმედებითნი საქმენი წარგვიმართენ, მიჴსენ განსაცდელთაგან, ჭირთა და სნეულებათა. განმაშორენ ყოველნი კრულებანი და შფოთნი, დამიფარენ ყოვლისა ელვაშემოსილისა ქუხილისა, ცეცხლისა, სიყმილისა, საფრჴისა, წარღუნისაგან და სიკვდილშემოსილისა წყლულებისა. მექმენ ჩუენ მოწყალებითა შენითა და შემწედ ყოველსა გზასა, ხმელთა ზედა და წყალთა შინა, რაჲთა არა დანთქმულ იქმნეს ერი ესე შენი. ჰოჲ, ყოვლადმოწყალეო, ღვთისამოყუარეო დედაო, სასოებითა დიდითა აღვავლენთ შენდა მომართ უბადრუკთა ამათ ლოცვათა ჩუენთა, ცრემლთა და სულთქმათა ჩუენთა ნუ უგულებელს-ჰყოფ, ნუმცა სადა დაგვიტევებ ჩუენ ყოველთა დღეთა ცხოვრებისა ჩუენისათა, არამედ მარადის ეგე ჩუენ თანა და მომმადლენ ჩუენ სიხარული, ნუეგშინისცემაჲ, მფარველობაჲ და შეწევნაჲ, რაჲთა ვადიდებდეთ და ვაქებდეთ უფროსადკურთხეულსა და ყოვლადსაგალობელსა სახელსა შენსა, ამინ!