წმ. გაბრიელ ეპისკოპოსის (ქიქოძე) სახელობის ფსიქოლოგიური დახმარების ცენტრი წმ. გაბრიელ ეპისკოპოსის (ქიქოძე) სახელობის ფსიქოლოგიური დახმარების ცენტრი შეიქმნა 2001 წელს საქართველოს საპატრიარქოსთან, სრულიად საქართველოს კათოლიკოს-პატრიარქის ილია II უშუალო კურთხევით. ცენტრის ძირითადი პრიორიტეტებია:

• უპოვართა და ხელმოკლეთა ფსიქოლოგიური კონსულტაცია და მკურნალობა;
• ფსიქიატრიისა და ეკლესიის დაახლოება; ცენტრის ინიციატივით ხორციელდება რეგულარული შეხვედრები მოძღვრებსა და ფსიქიატრებს შორის;
• ცენტრის ინიციატივითა და პატრიარქის ლოცვა-კურთხევით, ონკოლოგიური საავადმყოფოს სამლოცველოში ტარდება ჯანმრთელობის პარაკლისი პაციენტებისათვის. მოძღვარი სურვილისამებრ ნათლავს, იღებს აღსარებას და აზიარებს მათ;
• ცენტრში პერიოდულად ტარდება სალექციო კურსი საეკლესიო ფსიქოლოგიაში უმაღლესი სასწავლებლების ფსიქოლოგიის ფაკულტეტის სტუდენტებისათვის;

ნარკომანთა პირველადი რეაბილიტაციის ცენტრი

2006 წლიდან, გლობალური ფონდის მხარდაჭერით, ცენტრმა დაიწყო ნარკომანიით დაავადებულთა ფსიქო-სოციალური რეაბილიტაციის პროგრამის განხორციელება.

პროგრამა უფასოა;

მისი მიზანია ადამიანის განთავისუფლება ნარკოტიკულ ნივთიერებაზე დამოკიდებულებისაგან;

პროგრამა მოიცავს:

• მონაწილეების ინდივიდუალურ და ჯგუფურ ფსიქოლოგიურ დახმარებას
• საუბარს სულიერ საკითხებზე მოძღვართან და ცენტრის სპეციალისტებთან;
• წმინდა ადგილების მოლოცვას და სამონასტრო ცხოვრების გაცნობას;
• შრომით თერაპიას;

მნიშვნელობა არა აქვს, რა იყო წარსულში ან რა იქნება მომავალში, მთავარია იბრძოლო. ღმერთი პასუხს მოგთხოვს არა იმის გამო, რომ იღებდი ნარკოტიკს, არამედ იმისათვის, იბრძოდი თუ მაშინვე ნებდებოდი მას.

ღვთისმშობლის ხატი „შეუსმელი ბარძიმი“

ტროპარი

თაყვანსა ვცემთ რწმენითა ღვთიურსა და საკვირველსა ხატსა შენსა, ყოვლადწმიდაო ღვთისმშობელო, რომელი თასისა შეუსმელისაგან გულმოწყალებისა შენისაგან დაარწყულებ ჩვენთა გულთა და კეთილმორწმუნეთა კაცთა მოუვლენ სასწაულთა. ჩვენცა, მხილველნი და მსმენელნი ამისა ვიხარებთ სულითა და მხურვალედ გიღაღადებთ: დედოფალო უმოწყალესო, განკურნენ სნეულებანი და ვნებანი ჩვენნი, ევედრე ძესა შენსა, ქრისტესა ღმერთსა ჩვენსა, დახსნისათვის სულთა ჩვენთა.